«Osiet» жобасы аясындағы тағылымды кездесу
22.05.2026
2026 жылдың 22 мамыр күні мектебімізде «Osiet» жобасы аясында ерекше әрі мазмұнды іс-шара өтті. Аталған жоба Назарбаев Университеті студенттерінің бастамасымен жүзеге асырылып, ауыл мектептерінің оқушыларына арналған білім беру бағдарламаларын өткізуге бағытталған. Жобаның басты мақсаты – білім беру процесін тек пайдалы ғана емес, сонымен қатар қызықты етіп ұйымдастыру, оқушылардың жаңа білімге деген қызығушылығын арттыру.
Осы жоба аясында мектебімізге 10 жас студент келіп, оқушылармен танымдық және тәрбиелік маңызы зор кездесулер өткізді. Іс-шара сағат 13:00-де оқушылармен танысу, интерактивті ойындар өткізу және топтарға бөлу жұмыстарынан басталды. Бұл кезең оқушылардың бір-бірімен еркін араласуына, белсенділік танытуына және алдағы сабақтарға қызығушылықпен қатысуына мүмкіндік берді.
Бағдарлама барысында оқушылар жас ерекшеліктеріне қарай бірнеше бағыт бойынша білім алды. Кіші және жоғары сынып оқушыларына бағдарламалау, ағылшын тілі, психология, кәсіби бағдар және SMM бағыттары бойынша дәрістер өткізілді. Оқушылар бағдарламалау негіздерімен танысып, ағылшын тілін меңгерудің тиімді жолдары туралы ақпарат алды. Сонымен қатар психология бағытындағы сабақтар оқушылардың өзін-өзі тануына, қарым-қатынас мәдениетін қалыптастыруына және өз қабілеттерін бағалай білуіне ықпал етті.
Кәсіби бағдар беру бағыты бойынша жоғары сынып оқушыларына болашақ мамандық таңдау, білім алу мүмкіндіктері, мақсат қою және оған жету жолдары туралы пайдалы кеңестер берілді. Ал SMM бағыты бойынша қатысушылар қазіргі заман талабына сай контент жасау, әлеуметтік желіні тиімді пайдалану және ақпараттық кеңістікте сауатты жұмыс істеу жолдарымен танысты.
Кездесу барысында білім беру интерактивтері де ұйымдастырылып, оқушылар түрлі тапсырмалар орындап, өз білімдері мен қабілеттерін көрсетті. Іс-шара соңында белсенді қатысқан оқушылар марапатталып, оларға ерекше көңіл бөлінді.
«Osiet» жобасы аясында өткен бұл кездесу оқушыларға үлкен әсер қалдырды. Олар жаңа бағыттармен танысып, өздерін қызықтырған сұрақтарға жауап алды. Әсіресе Назарбаев Университеті студенттерінің ашық әңгімесі, қызықты дәрістері мен заманауи тақырыптарды қамтуы оқушылардың көңілінен шықты.
Қорыта айтқанда, мұндай жобалар ауыл мектептері үшін өте маңызды. Себебі олар оқушылардың ой-өрісін кеңейтіп, болашаққа деген сенімін арттырады. «Osiet» жобасы білімге құштар жас ұрпаққа жаңа мүмкіндік сыйлап, олардың тұлғалық дамуына оң ықпал етті.
